စာကြည့်စားပွဲလေးကနေ အပြင်ဘက် တောအုပ်ထဲကို ငေးကြည့်နေမိသည်။ တောအုပ်ဘေးမှာ ပန်းခြံလေး။ ကလေးပေါင်းစုံ ဆော့ကစားနေကြသည်။ ဒါန်းစီးသည်။ ပြေးလွှားဆော့ကစားနေကြသည်။ မိဘ အုပ်ထိန်းသူတို့က ဘေးနားမှာ။ သူတို့ နိုင်ငံမှာ သူတို့တွေလည်း ပျော်ကြမှာပဲလေ။ သူတို့မှာ မိသားစုရှိသည်။ မိတ်ဆွေရှိသည်။ ဒါသည် သူတို့ အသိုင်းအ၀ိုင်းဖြစ်သည်။

ကျွန်တော်ကတော့ ဒီနေရာလေးမှာ တစ်ယောက်တည်းပဲ။ မနက်အိပ်ရာထလည်း တစ်ယောက်တည်း။ ကျောင်းသွားလည်း တစ်ယောက်တည်း။ သူငယ်ချင်းအပေါင်းအသင်းများတို့ကလည်း ဒီနေရာလေးနှင့် ဝေးကွာသည့်နေရာများမှာလေ...။ တစ်ယောက်ကို တစ်ယောက်သွားလည်ဖို့လည်း ငွေရော အချိန်ရော အင်မတန် ခက်ပါသည်။ ဆက်သွယ်ဖြစ်သည်။ လေလှိုင်းကြားကဆင့်။ အင်တာနက်တွေ ကြိုးတွေကြားက ဆက်သွယ်ချက်တွေက ပြင်ပလောက်တော့ ရင်ကို နွေးထွေးမှုမပေးတာကတော့ အသေအချာပဲလေ။

ကိုယ့်ဘ၀ ကိုယ်ရည်မှန်းချက်အတွက်သာ ဝေးတနေရာမှာ လာရောက်နေထိုင်နေရသည်။ သူငယ်ချင်း အပေါင်းအသင်းလည်း တိုးလာပါသည်။ မိတ်ဆွေလည်း တိုးလာပါသည်။ ဒါပေမယ့် ယဉ်ကျေးမှုမတူ အခြေခံ ခံယူချက်ခြင်းမတူ အသိုင်းအ၀ိုင်းချင်းမတူတာကြောင့် တကယ်ပဲ ဒီဆက်သွယ်ချက်တွေက ရင်ကို မနွေးထွေးစေတာကတော့ အမှန်ပဲလေ။

ဘာပဲ ပြောပြော.. နေရာသစ်တစ်ခုမှာ အနည်ထိုင်နိုင်ဖို့ ကြိုးစားရင်းနဲ့ အတိတ်က သူငယ်ချင်းတွေနဲ့ မိသားစုတွေနဲ့ မိတ်ဆွေတွေနဲ့ ပျော်ရွှင်ခဲ့တဲ့ဘ၀ကို စိတ်ကူးခဏခဏ ယဉ်မိပါတယ်ဗျာ..။