ဆိုဒ်ကားပေါ်မှာ လူစောင့်နေရင်း ကျွန်တော် ငိုင်နေမိသည်။ ဒီနေ့ လူအင်မတန်ပါးသည်။ ယခု မွန်းတည့်ချိန်အထိ ဧည့်သည်နှစ်ယောက်သာရသေးသည်။ လက်ထဲတွင် ကျစ်ကျစ်ပါအောင် ဆုပ်ထားသည်က ငွေသား သုံးရာ။ နေ့လည်အထိ စောင့်ကြည့်လို့မှ အုံနာကြေးကျေပါ့မလား..။ တွေးရင်းနှင့် ရင်ပူလာသည်နှင့် ရေထသောက်မိသည်။

ဆိုဒ်ကားဖင်ထိုင်ခုံတွေကို ဆွဲလှန်လိုက်ပြီး လှဲအိပ်လိုက်မိသည်။ မျက်လုံးလေးကို အသာမှိတ်လိုက်တော့ ပေစိ၊ ပူတူး၊ ခွေးမ၊ ကြွက်နီစသည့် ရင်တွင်းဖြစ် မျိုးဆက်သစ်လေးများ၏ မျက်နှာတို့က အစီအရီ..။ ဒါတောင် မိသက် လတ်တလော မွေးထုတ်ထားသည့် ၂ လသားလေး (မည်းတူလို့ အမည်ပေးရမည်လားမသိ) ရှိနေသေးသည်။ ပေစိက အကြီးဆုံး ၈ နှစ်။ ပူတူးက ၆ နှစ်။ ခွေးမက ၄ နှစ်။ ကြွက်နီက ၃ နှစ်။ နှစ်အနည်းငယ်စီ ခြားမွေးထားသည့် အတွက် ကျွန်တော်တို့ လင်မယား ဒီရပ်ကွက်မှာ နည်းနည်းတော့ နာမည်ကောင်းရနေသေးသည်။

မိသက်ဗိုက်မကြီးခင်ကတော့ ရပ်ထဲလှည့်ပြီး အ၀တ်လျှော်သည်။ ခိုင်းဖော်ခိုင်းဖတ်ပေါ့လေ။ ဆန်လေး ဆီလေး ရလည်း မဆိုးဘူးလေ။ ကျွန်တော်တို့ဘ၀မှာကလည်း တီဗီမရှိ ဘာမရှိနဲ့ဆိုတော့ ဘ၀အမောပြေစရာဆိုတာ ရှာကြံနေရတာကလား။ ဗိုက်တစ်လုံးပြီးတစ်လုံးနဲ့ မိသက်ကတော့ မျက်စောင်းကြီးခဲပြီး ကြည့်နေပေမယ့် ကျွန်တော်မသိသလိုပဲနေခဲ့မိတာ အခုမှားများမှားသွားပြီလား..။

အရင်နှစ်တွေကတော့ နည်းနည်းချောင်လည်တာနဲ့ ပေစိလေးကို ကျောင်းထားနိုင်ခဲ့သည်။ အခု ပူတူးလေးကလည်း ကျောင်းတက်ချင်နေပြီ။ မိသက်ကလည်း မီးနေသည်ဆိုတော့ ဘာမှတခြားဝင်ငွေမရှာနိုင် သေးဘူးလေ။ မိသားစုခြောက်ယောက်စာတောင် အနိုင်နိုင်ရှာဖွေနေရတာ အခု ပါးစပ်တစ်ပေါက်ထပ်တိုးလာပြီ။ တနေ့တနေ့ တအိမ်လုံးစားဖို့ ဆန်ကို အနိုင်နိုင်ရှာကြံဝယ်နေရတာ ဒီနေ့တော့ ၀ယ်နိုင်ပါ့မလား..။ ဟူး....။ သက်ပြင်းကို မှုတ်ထုတ်လိုက်ရုံကလွဲလို့ ကျွန်တော်လည်း မကြံတတ်တော့ဘူးဗျာ။

ကျွန်တော့်အိမ်ကနေ ဒီဆိုဒ်ကားမောင်းတဲ့နေရာကို လာရတဲ့ခရီးက မနည်းဘူးဗျ။ လိုင်းကားခတွေကလည်း တက်ပြီးရင်းတက်..။ မနေ့က ကျန်တဲ့ ထမင်းကြမ်းတွေကို ဆားလေးဖြူး၊ ကြက်ဥလေးပြုတ်ပြီး ထမင်းချိုင့်ထည့် လာလို့သာ ကျွန်တော်နေ့လည်စာမငတ်တယ်..။ တွေးရင်းနဲ့ ဗိုက်လေး ဆာတာတာဖြစ်လာတာ ထမင်းချိုင့်လေး ဖွင့်စားဦးမှ လို့ ပြင်မိတော့ မျက်လုံးတွေက တနေရာမှာရပ်တန့်သွားသည်။

ကျွန်တော်တို့ ဆိုဒ်ကားဂိတ်ရဲ့ မျက်စောင်းထိုးလေးက အိမ်လေး။ ကောင်မလေးတစ်ယောက် ခြံထဲတွင် စာဖတ်နေရင်းမှ အိမ်ထဲ ထ၀င်သွားခဲ့သည်။ သူမဘေးမှာ ကျန်ခဲ့သည်က ကော်ဖီခွက်လေးနှင့် လက်ကိုင်ဖုန်းလေးတစ်လုံး...။ အကြည့်တို့ကို လွဲရင်း ထမင်းစားဖို့ ပြင်သည်။ ကြက်ဥပြုတ်လေးကို ပါးစပ်လေးထဲ ထည့်မည်အလုပ် ခုနက ကောင်မလေး ၀ရုန်းသုန်းကားနှင့် အပြင်ကို ထွက်သွားခဲ့သည်။ အိမ်တံခါးကို သော့ခတ်သွားခဲ့ပြီး ကမန်းကတန်း ထွက်သွားခဲ့သည်။

ကျွန်တော့်အကြည့်တို့က ခုနက ဖုန်းလေးပေါ်မှာ...။ ကြက်ဥပြုတ်ကို တလှည့်၊ ပေစိတို့ မျက်နှာလေးတွေကို တလှည့်၊ မိသက် မျက်နှာလေးကို တလှည့်၊ ငါးပါးသီလကို တလှည့်၊ ထိုလက်ကိုင်ဖုန်းလေးကို တလှည့် မြင်ယောင်နေမိပြီး ခေါင်းထဲတွင် အတွေးတွေ ရောက်ယက်ခတ်နေတော့သည်....။ ထိုမြင်ကွင်းတွေကို ဆန်မရှိတော့သည့် အိုးလေးက လွှမ်းမိုးသွားလေမည်လား...